ໃບຕາດິນ ແມ່ນເອກະສານທີ່ເປັນຫຼັກຖານຕົ້ນຕໍ ອັນໜຶ່ງອັນດຽວກ່ຽວກັບສິດນຳໃຊ້ທີ່ດິນຢ່າງຖາວອນ ຊຶ່ງໄດ້ຄັດສຳເນົາຢ່າງຖືກຕ້ອງຈາກປຶ້ມທະບຽນທີ່ດິນ ເພື່ອມອບໃຫ້ແກ່ຜູ້ເປັນເຈົ້າຂອງທີ່ດິນພຽງໃບດຽວ ເພື່ອຖືໄວ້ເປັນຫຼັກຖານຍາວນານ ຈົນກວ່າຈະມີການປ່ຽນແປງໃໝ່ ຕາມເງື່ອນໄຂທີ່ໄດ້ກຳນົດໄວ້ໃນກົດໝາຍ.
ມາໃນຕອນເຊົ້າຂອງວັນທີ່ 23 ທັນວາ 2019 ທີ່ຜ່ານມານີ້ ຢູ່ທີ່ຫ້ອງວ່າການ ເມືອງໃໝ່ ໄດ້ຈັດໃຫ້ມີພິທີມອບ-ຮັບໃບຕາດິນຖາວອນຢ່າງເປັນລະບົບ ລະຫວ່າງ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ ແລະ ຫ້ອງການຊັບພຍາກອນທໍາມະຊາດ ແລະ ສິ່ງແວດລ້ອມ ເມືອງໃໝ່ ເປັນກຽດເຂົ້າຮ່ວມພິທີ ມອບ-ຮັບໃບຕາດິນຖາວອນໃນຄັ້ງນີ້ ມີ ທ່ານ ສອນສະນຸກ ສີສຸລາດ ຮອງເຈົ້າເມືອງ ເມືອງໃໝ່ ຜູ້ຊີ້ນໍາວຽກງານຂົງເຂດເສດ ຖະກິດ, ມີ ທ່ານ ເດດ ຢັນຊະນະ ຮອງຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຜົ້ງສາລີ, ມີ ບັນດາຫົວໜ້າຫ້ອງວ່າການເມືອງ, ສະຫະພັນແມ່ຍິງເມືອງ, ມີທີມງານພະນັກງານວິຊາການຂັ້ນແຂວງ, ຂັ້ນເມືອງເຂົ້າຮ່ວມທັງໝົດ 26 ທ່ານ, ຍິງ 17 ທ່ານ.
ໃນພິທີດັ່ງກ່າວໄດ້ຮັບການລາຍງານຫຍໍ້ຈາກ ທ່ານ ເປັ່ງຄໍາ ມີພູວຽງ ຫົວໜ້າຫ້ອງການ ຊສ ເມືອງຜົ້ງສາລີ ຜ່ານການຈັດຕັ້ງປະຕິບັດວຽກງານອອກໃບຕາດິນ ແຕ່ລະ ໜ້າວຽກເລີ່ມຈາກການສຳຫຼວດວັດແທກເຂດແດນຂອງແຕ່ລະຕອນດິນຈົນຮອດວຽກງານສືບສວນສິດ ແລະ ພິສຸດຫຼັກຖານ, ຊອກຮູ້ປະຫວັດຄວາມເປັນມາຢ່າງຈະແຈ້ງ ແລະ ສາມາດເກັບກຳຂໍ້ມູນເບື້ອງຕົ້ນໄດ້ຄື: ວຽກງານປະຊາສຳພັນ ແມ່ນມີບັນດາພະນັກງານຫ້ອງການກອ້ອມຂ້າງເມືອງ ພໍ່ແມ່ປະຊາຊົນ ເຖົ້າແກ່ແນວໂຮມຂອງບ້ານ ເຂົ້າຮ່ວມຢ່າງພ້ອມພຽງ. ສຳລັບແຜນການໃນເບື້ອງຕົ້ນແມ່ນ 454 ຕອນ, ສາມາດພິສູດຫຼັກຖານອອກໃບຕາດິນໄດ້ 526 ຕອນ ມີເນື້ອທີ່ທັງໝົດ 1,133,379 ຕາເມັດ.
ສັງເກດລວມແລ້ວ ໃນການມອບ-ຮັບໃບຕາດິນຖາວອນໃນຄັ້ງນີ້, ເຫັນວ່າປະຊາຊົນມີຄວາມພໍອົກພໍໃຈ ທີ່ຕົນເອງໄດ້ຮັບສິດນໍາໃຊ້ທີ່ດິນໃບຕາດິນຖາວອນເປັນຄັ້ງທໍາອິດ ແລະ ເຫັນໄດ້ເຖິງຄຸນຄ່າຂອງໃບຕາດິນ ເພາະການອອກໃບຕາດິນແມ່ນຮູບການໜຶ່ງໃນການຫັນທີ່ດິນເປັນທຶນ, ເອກະສານຖືກຕ້ອງຕາມລະບຽບກົດໝາຍ ແລະ ເພື່ອແກ້ໄຂຄວາມທຸກຍາກຂອງພໍ່ແມ່ປະຊາຊົນຜູ້ທີ່ນຳໃຊ້ທີ່ດິນ ແລະ ພັດທະນາຕອນດິນດັ່ງກ່າວ ເຊິ່ງພວກເຮົາໄດ້ເອົາໃຈໃສ່ປະຕິບັດໃນຂອບເຂດທົ່ວປະເທດ ເວົ້າລວມເວົ້າສະເພາະ ແຂວງຜົ້ງສາລີພວກເຮົາ ຖືເອົາວຽກງານອອກໃບຕາດິນເປັນສຳຄັນ ແລະ ຮີບດ່ວນທີ່ສຸດ.
ໃນຕອນທ້າຍ ຂອງພິທີຍັງໄດ້ຮັບກຽດໂອ້ລົມຂອງທ່ານ ເດດ ຢັນຊະນະ ຮອງຫົວໜ້າ ພຊສ ເຊິ່ງທ່ານໄດ້ເໜັ້ນໜັກເຖິງຄວາມໝາຍ ແລະ ຄວາມສຳຄັນ ຂອງໃບຕາດິນ ເຊິ່ງແຕ່ນີ້ເອີ້ນວ່າ ເປັນກຳມະສິດ ຂອງຜູ້ນຳໃຊ້ມີຄວາມສະດວກແກ່ການພັດທະນາ, ການຄຸ້ມຄອງຂອງລັດ ແລະ ເມືອມີພຶດຕິກຳການເຄື່ອນໄຫວກ່ຽວກັບທີ່ດິນຂອງຕົນເອງເປັນເວລາຍາວນານແຕ່ລຸ້ນນີ້ຈົນຮອດລຸ້ນສືບທອດຕໍ່ໆໄປໃນອານາຄົດ ວຽກງານພິສຸດຫຼັກຖານ ແລະ ອອກໃບຕາດິນ ຍັງສືບຕໍ່ຈັດຕັ້ງປະຕິບັດຢ່າງເປັນປົກກະຕິ ແລະ ຍງັຈະຕ້ອງໄດ້ສືບຕໍ່ຈັດຕັ້ງປະຕິບັດຢູ່ບ້ານຕໍ່ໄປຕາມແຜນການທີ່ວາງໄວ້